Dangilag sa pangandoy

Jerry Villanueva

ANG kalayo kon walay dangilag magapulaw lamang dili modilaab hangtud nga mapalong. Mao pod ang pangandoy kon walay danilag, magapulaw lamang sa padumduman hangtud mahanaw.

Mao pud sa akong pagtuon sa panulat. Pila sa akong mga sugilanon nga gibasura kay wala man mapatik. Giabot na ako og kabugnaw ug dayon na unta nga kabapalong sa akong pangandoy.

Apan nakahunahuna ako kang Charles Dicken (1312) English Novelist. Ka 50 niya ka sugilanon una pa makatilaw ug tinta sa patikanan kay mao pa man mapatik. Maoy nakapabuhi sa akong paglaom ug milampos ako.

Ang tingusbawan (ambition) makab-ot diay pinaagi sa panlimbasog. Kay si Demosthenes (380 BC) sa Gresya nganga (stammer) dugay makalitok pagsulti. Apan naningkamot pagkab-ot sa iyang tingusbawan. Si Demosthenes giila nga bantog nga orador sa iyang panahon.

Duna pay lain nga dangilag nga nagmalampuson sa paningkamot. Kadto si Antonio Tormis sa Cebu. Kabos nangutsero. Miiskuyla sa gabii. Nakaabot pa gyud pagka-abogado.
Usa ka panahon misakay siya og tartanilya kay nadaot ang iyang awto. Sa iyang pagpara sa tartanilya, ang kutsero mipadungo sa kalo pagsalipod sa nawong.
“Bay mora man og kaila kita kaniadto?” pangutana ni Atty. Tormis sa nakasakay na sa tartanilya.

“Kaila baya ko nimo Attorney. Kauban man kaniadto nga kutsero. Maayo Kaman kay naabogado. Ako intawon nagpabilin nga kutsiro,” maoy tubag sa kutsero.
“Ang nakasayop nimo Bay,” matod ni Attorney Tormis. “Ang imong kakabus imong gihimo nga lusaran paingon sa ubos. Gihimo pa unta nimo nga tikanganan paingon sa taas, pareho unta kita karon.”

Oo, ang kalamposan makab-ot sa paningkamot, dili sa panghinaot. Ingon nga ang katahom sa bangaw hinungaw sa kainit sa kinaiyahaan, mao man ang kalampusan inalisngaw sa nagdilaab nga panlimbasog. Nga matod usab ni William Penn: “No pain, no palm; no thorns, no throne; no goal, no glory; no cross, no crown.”